ឯកឧត្តម ជា សុផារ៉ា៖ បើចង់មានត្រូវទិញដី តែកុំទិញផ្ទះ
ការវិនិយោគក្នុងវិស័យអចលនទ្រព្យ គឺជាការវិនិយោគ ដែលមិនខាតនោះទេ ទោះជាអចលនទ្រព្យព្រភេទណាក៏ដោយ។ ជាក់ស្តែង បើអ្នកវិនិយោគ លើ ផ្ទះ ខុនដូរ អ្នកអាចដាក់ជួល ឬសម្រាប់រស់នៅបាន ចំណែកដីទុកយូរឡើងថ្លៃ អាចលក់ចំណេញច្រើន។
ថ្លែងនៅក្នុងកម្មវិធី បញ្ចុះបឋមសិលាសាងសង់លំនៅឋានសមរម្យរបស់ក្រុមហ៊ុន Arakawaកាលពីពេលថ្មីៗនេះ ឯកឧត្តម ជាសុផារ៉ា បានលើកឡើងថា “បើសិនអត់សូវមានលុយទេ កុំទិញផ្ទះ គួរតែងាកមកទិញដីវិញ បើសិនជាចង់មាន។”
ឯកឧត្តម បានបន្ថែមថា៖ «បើអត់លុយ កុំទិញផ្ទះ អត់លុយត្រូវតែទិញដី អ្នកអ្នកចង់មាន មានតែទិញដីទេ។ បើអត់មានផ្ទះ ខ្ញុំថា ចងតង់ ចងស្បូវ២០ទៅ៣០កណ្តប ធ្វើចង្ក្រានបាយដេកវៀនទៅ វាក៏នៅតែគ្រាន់បើ។ ថ្ងៃក្រោយ ដីនេះឡើងថ្លៃយើងក្លាយជាអ្នកមាន។ ផ្ទុយទៅវិញ បើយើងទិញផ្ទះ អត់ប្រយោជន៍ទេ រស់នៅអន់ចុះ ប៉ុន្តែ ភ្ជាប់ជាមានការដាំដុះ ដីកើតមិនងាយទេ តែមនុស្ស ងាយនឹងកើត»។
ជាមួយគ្នានេះដែរ លោក គីម ហ៊ាង អ្នកជំនាញ ផ្នែកអចលនទ្រព្យ បានធ្លាប់មានប្រសាសន៍ប្រាប់ពាណិជ្ជកម្មកម្ពុជា ផងដែរថា ដីអាចលក់បានថ្លៃជាងផ្ទះ ប៉ុន្តែដាច់ខាតកុំខ្ចីលុយធនាគារ ដើម្បីទិញដី គួរតែទិញដីដោយប្រើលុយខ្លួនឯង ប៉ុន្តែប្រសិនបើផ្ទះ គឺយើងចំណេញ ក្នុងការរស់នៅ ហើយនៅពេលដែលយើងបង់រំលោះរួចនឹងក្លាយជារបស់យើងហើយ។
ទោះជាយ៉ាងណា មុនសម្រេចចិត្តទិញអ្វីមួយ អ្នកគួរតែគិតលើកត្តាចរន្តសាច់ប្រាក់ ជាជាងការគិតតែពីការរំពឹង ពីការទ្បើងថ្លៃរបស់ទ្រព្យនោះ។ជាការពិតដែលថាទ្រព្យតែងទ្បើងថ្លៃជានិច្ចក្នុងរយៈពេលវែង តែក្នុងរយៈពេលខ្លីវាក៏អាចចុះថ្លៃបានដែរ។ ពេលដែលវាចុះថ្លៃនោះហើយ ជាពេលដែលគ្រោះថ្នាក់ សម្រាប់អ្នកដែលទិញចង់បានចំណេញពីការទ្បើងថ្លៃ៕
អត្ថបទ៖ ពេញជ្រ ស្រីវណ្ណ
ប្រភព៖ www.business-cambodia.com
Comments
Post a Comment