ស្វែងយល់លម្អិត ពីការផ្ទេរកម្មសិទ្ធិអចលនទ្រព្យដែលមានប្លង់ទន់ និងប្លង់រឹង
ការទិញលក់អចលនទ្រព្យ មិនថា ដី ឬផ្ទះ ចាំបាច់តម្រូវឱ្យមានការផ្ទេរកម្មសិទ្ធិពីម្ចាស់អចលនទ្រព្យ ទៅកាន់អ្នកទិញដើម្បីបញ្ចៀសបញ្ហាផ្សេងៗ។ ប៉ុន្តែរហូតមកដល់បច្ចុប្បន្ននេះ មានប្រជាពលរដ្ឋជាច្រើននៅមិនទាន់យល់ច្បាស់នៅឡើយ ពីការផ្ទេរកម្មសិទ្ធិដែលមានប្លង់រឹង និងប្លង់ទន់។ ដូចនេះតើប័ណ្ណកម្មសិទ្ធិនេះជាអ្វី? មានប្រវត្តិតាំងពីពេលណា? ខាងក្រោមនេះជាពន្យល់លម្អិតពីប័ណ្ណកម្មសិទ្ធិ ប្លង់ទន់ ប្លង់រឹង ពីសំណាក់ លោក ច្រឹក សុខនីម អគ្គនាយកក្រុមហ៊ុនអចលនទ្រព្យ Century 21 Mekong ។
១. ប្រវត្តិប័ណ្ណកម្មសិទ្ធិក្នុងប្រទេសកម្ពុជា
ចំពោះប្រវត្តិប័ណ្ណកម្មសិទ្ធិក្នុងប្រទេសកម្ពុជា លោក ច្រឹក សុខនីម បានឱ្យដឹងថា មានច្រើនសណ្ឋានដូចជា ប័ណ្ណកម្មសិទ្ធិប្រភេទស្លាបមាន់ប្រើប្រាស់ក្នុងឆ្នាំ ១៩៨០ ដល់ឆ្នាំ១៩៨៥ មុនប័ណ្ណ ស្លាបមាន់នេះទៀត គឺមានប័ណ្ណកន្ទុយត្រី។ លិខិតកាន់កាប់អចលនទ្រព្យ ពីឆ្នាំ១៩៨៥ ដល់ឆ្នាំ១៩៨៩ រហូតមកដល់ឆ្នាំ២០០០ គឺចាប់ផ្ដើមមានប័ណ្ណកម្មសិទ្ធិប្លង់រឹង និងប្លង់ទន់។
២. ប្រភេទប័ណ្ណកម្មសិទ្ធិប្លង់ទន់ និងប្លង់រឹង
ប្លង់ទន់ គឺសំដៅទៅលើវិញ្ញាបនបត្រដែលបញ្ជាក់ត្រឹម អាជ្ញាធរ ឃុំ សង្កាត់។ ចំណែកប្លង់រឹងគេបែកចែកពីរសណ្ឋានធំៗ ប័ណ្ណកម្មសិទ្ធិដាច់ដោយឡែក និង ប័ណ្ណកម្មសិទ្ធិ អិលម៉ាប។ ប័ណ្ណកម្មសិទ្ធិដាច់ដោយឡែក គឺជាប័ណ្ណមួយដែលម្ចាស់អចលនទ្រព្យ ធ្វើការដាច់ដោយឡែក សម្រាប់ប្រើប្រាស់ផ្ទាល់ខ្លួន ឧទាហរណ៍ដូចជានៅក្នុងបុរីមួយម្ចាស់ផ្ទះនោះ រត់ការធ្វើឯកសារតែម្នាក់ឯង អ្នកផ្សេងទៀតមិនទាន់មានប័ណ្ណកម្មសិទ្ធិទេ។
ចំណែកប័ណ្ណកម្មសិទ្ធិ អិលម៉ាប គឺគេចុះធ្វើជារួមដល់បងប្អូនប្រជាពលរដ្ឋ ដែលជាគោលនយោបាយរបស់រាជរដ្ឋាភិបាល។ ចំពោះប័ណ្ណកម្មសិទ្ធិប្លង់រឹងទាំងពីរប្រភេទនេះ គឺយល់ព្រមនិងទទួលស្គាល់ដោយរដ្ឋាភិបាល អាចប្រើប្រាស់ជាផ្លូវការសម្រាប់ជួញដូរអចលនវត្ថុ។
លោក ច្រឹក សុខនីម
៣. នីតិវិធីការធ្វើប័ណ្ណកម្មសិទ្ធិ ប្លង់ទន់ និងប្លង់រឹង
អគ្គនាយកក្រុមហ៊ុន Century 21 Mekong ប្រាប់ថា ចំពោះប្លង់ទន់ មុនឆ្នាំ ២០០០ បញ្ជាក់ត្រឹមតែសង្កាត់ទេ តែក្រោយឆ្នាំ ២០០០ រាល់ការបញ្ជាក់ប្លង់ទុន គឺត្រូវទៅដល់ខណ្ឌ ស្រុក ទើបប្រើប្រាស់ជាផ្លូវការ ប៉ុន្តែមិនទាន់ចុះបញ្ជីស្នាមត្រឹមត្រូវនៅក្រសួងនៅឡើយទេ។
ការកាត់ឈ្មោះជាប្លង់ទន់ត្រូវបង់ពន្ធប្រថាប់ត្រា ៤% រាល់ការទិញលក់អចលនទ្រព្យ ដើម្បីធ្វើឱ្យមានភាពសុក្រឹត។ ប៉ុន្តែលោកនិយាយថា ចំពោះប័ណ្ណកម្មសិទ្ធិប្លង់ទន់នេះ គឺប្រឈមនឹងបញ្ហាច្រើននៅពេលមានការផ្ទេរកម្មសិទ្ធិពីមួយទៅមួយ។ ដូច្នេះហើយទើបតម្រូវឱ្យមានការកាត់ឈ្មោះត្រឹមត្រូវ និងបង់ពន្ធប្រថាប់ត្រានេះ។
ដោយឡែក ចំពោះប្លង់រឹង លោក ច្រឹក សុខនីម បានឱ្យដឹងថា ត្រូវចុះបញ្ជីស្នាម នៅក្រសួងរៀបចំដែនដី នគរូបនីយកម្ម និងសំណង់ ហើយអាចប្រើប្រាស់ជាផ្លូវការបាន មិនសូវប្រឈមបញ្ហាច្រើនដូចប្លង់ទន់នោះទេ។ លោកបន្តទៀតថា រាល់ការផ្ទេរសិទ្ធិ មិនថាប្លង់រឹងប្លង់ ឬទន់ទេ ត្រូវបង់ពន្ធប្រថាប់ត្រា ៤% ពីព្រោះពន្ធប្រថាប់ត្រា គឺជាកាតព្វកិច្ចរបស់ម្ចាស់អចលនវត្ថុដែលត្រូវកាត់ទុក ៤%នៃតម្លៃអចលនវត្ថុ នៅពេលមានការទិញលក់ប្ដូរឈ្មោះ៕
ស្វែងយល់បន្ថែមតាមរយៈវីដេអូសម្ភាសន៍៖
Comments
Post a Comment